Ասպիրանտուրա

Գևորգյան Հոգևոր Ճեմարանի ասպիրանտուրայի կրթական ծրագիրը նպատակ ունի ապահովելու խորքային գիտական պատրաստություն աստվածաբանական գիտությունների բնագավառում՝ համադրելով եկեղեցական ավանդությունը և ժամանակակից ակադեմիական հետազոտական մեթոդները։

Նպատակներ

Ծրագրի հիմնական նպատակն է զարգացնել աստվածաբանական գիտական մտածողությունը, ձևավորել հետազոտական և վերլուծական հմտություններ ունեցող մասնագետներ, որոնք կարող են գիտականորեն ուսումնասիրել և մեկնաբանել քրիստոնեական վարդապետությունը, Սուրբ Գրքի բովանդակությունն ու պատմական միջավայրը, ինչպես նաև նպաստել հայ աստվածաբանական դպրոցի զարգացմանը։

Ուսուցման ուղղությունները

Ասպիրանտական ուսուցումն ընդգրկում է աստվածաբանական գիտության հիմնական բաժինները․

• Աստվածաշնչագիտություն — Հին և Նոր Կտակարանների պատմական, գրական և աստվածաբանական ուսումնասիրություն, մեկնության ավանդության և քննաբանական մեթոդների վերլուծություն։
• Մեկնություն և մեկնաբանություն (էքզեգետիկա, հերմենևտիկա) — Սուրբ Գրքի մեկնության պատմություն, տեքստաբանական, պատմաքննական և ժամանակակից հերմենևտիկական մեթոդաբանություններ։
• Տեսական (սիստեմատիկ) աստվածաբանություն — հավատքի և բանականության փոխհարաբերություն, ճշմարտության, փորձառության, ճանաչողության և աստվածաբանական լեզվի հիմնախնդիրներ։
• Դավանաբանական աստվածաբանություն — քրիստոնեական դավանանքի հիմնարար վարդապետություններ՝ Արարչաբանություն, Մարդաբանություն, Երրորդութենաբանություն, Քրիստոսաբանություն, Փրկաբանություն, Եկեղեցաբանություն, Խորհրդաբանություն և Վախճանաբանություն։

Ծրագրի առանձնահատկությունները

• Կրթական գործընթացը համադրում է տեսական ուսուցումն ու գիտահետազոտական աշխատանքը։
• Ուսանողները մասնակցում են գիտական քննարկումների, սեմինարների և գիտաժողովների։
• Ծրագիրը խթանում է գիտական հրապարակումների և թեկնածուական ատենախոսության պատրաստման գործընթացը։
• Ուսուցումն իրականացվում է փորձառու հոգևոր և ակադեմիական դասախոսների մասնակցությամբ։

Ակնկալվող արդյունքներ

Ծրագրի ավարտին ասպիրանտը.

• տիրապետում է աստվածաբանական գիտության տեսական հիմքերին և հետազոտական մեթոդներին,
• ունակ է իրականացնել ինքնուրույն գիտական ուսումնասիրություններ և մեկնաբանական աշխատանքներ,
• պատրաստ է դասավանդելու և գիտահետազոտական գործունեություն ծավալելու հոգևոր, ակադեմիական և կրթական հաստատություններում։